بسم الله الرحمن الرحيم ..

البوست اليوم حيكون بوست نقاش  عن علمين ,,

علم الطب -  علم ادارة الاعمال

امس كونت بتكلم مع صحبتي عادي وما احلانا .. الا في الكلام جا موضوع..

 وقالت انها ماتحب تخصص ادارة الاعمال تكرهو

وتحسو قسم اهبل وانو اللي يدخلو فاشلين ..

وانا قوتلها بالعكس القسم دا حلو واني انا ما احب التفكير دا حقت الناس

 انو قسم الادارة حقت فاشلين بالعكس دراسة القسم دا

في حسابات ورياضيات وقوانين ويبالها مخ شغال ..

فـ هيا  بتقول انو لا القسم دا مو مهم وان الطب اهم من الادارة في حياتنا

والادارة شي مو مهم .. وبدا النقاش الطوويل العريض بين الطب والادارة ..

ما رح اتكلم عن النقاش حقتنا لانو مرا كان عوويص وطوويل جدن جدن جددددن

بس مختصرو..

 انها هيا بتقول انو الطب اهم من الادارة لانو بدون الطب ماحنتعالج ونموت

والطب اكتشفوا قبل الادارة يعني اهم من الادارة وكمان انو محد يدخل القسم دا

لانو قسم صعب يعني مهم وحياة ناس بين يدينهم وانو دايمن أي شخص

 لما نجي نسالو ايش تبغى تتخصص يكون نفسو طب

 بس ما قبلو ودخل غصبن عنو ادارة او أي شي تاني  ..

وانا قوتلها انو الطب ما اكتشفو قبل الادارة لانو الادارة مو بس ادارة شركات

الادارة ادارة ذاتك وادارة حياتك واسرتك وبعدها ادارة عملك

واصلن الادارة موجودة في كل انسان فطريا ودا دليل اهميتها ..

 واما عن القسم فـ قسم الطب ما يدخلو أي احد لانو فعلا قسم حساس

وحياة ناس بين يديهم وكمان يبغالو انسان متفرغ ومخو يحفظ

 لانو اغلبو حفظ بس مو يعني انو اهم من الادارة .. ومو كل الناس تبغى طب ..

 انا من الناس اللي لو جابو الطب لين عندي ما اختارو ..

وكلامي ما بيقلل من اهمية الطب

 بالعكس انا قوتلها انو الطب مرا مهم في الحياة بس مو اهم من الادارة ..

 الاتنين مهمين في حياتنا .. لانو الادارة ادارة كل شي ..

 و طب بدون ادارة ما ينفع وادارة بدون طب ما تنفع .. يعني متساويين .

سؤوالي .. ابغا اعرف رايكم .!!

اختارو مع ذكر السبب < اختبار ههههههههه

1. الادارة اهم من الطب .. وليش ؟!
2. الطب اهم من الادارة .. وليش ؟!
3. الاتنين مهمين في الحياة .. وليش ؟!

وفي الاخر .. اختلاف الراي لا يفسد للود قضية ،, ^^